Kesultanan Sulu

SULTAN SULU ATAWA SULTAN FILIPINO?

Andu' ka'ilu hi Sultan Filipino!!
Imakun siya Sultan Sulu,
Nagpatural nasadja hababa'an si pamarinta satru',
Daing pa ha kaapu'an niya imakun Sultan,
In hula' kalasahan tiyukbal na katantan,
Pa bangsa kafir ipun sin King Philip II "bulasan".

Gampa hi apu'niya Sultan Jamalul Alam,
Hat sadja siyanda' in North Borneo kalasahan,
Pa bangsa Anggalis ha niyat sukayan,
Ha masa yadtu in kastila imatu di'da hikalaban,
Ha manga Tausug kaslugan-gagandilan,
Tahan sadja dima magsulut in Kastila' bugaan,
Sabab mataud sila kiyamatayan,
Na kalidji utut iban tai' in kaibanan,
Hat sadja liggatan mata sin pahallawan,
Tausug bayan,
Misan kiyada'ganan imiyan pa "mattay sakaw yan".


NUSULAN SIN TAUSUG

InsyaAllah manga taymanghud ku kalasahan,
Ha susungun adlaw bang ta kaabutan,
Hipabalik da sin Tuhan ta Al-Mannan,
Ukum sakup sin kamaasan ta magsusultan,
Biya' da sin sambatan,
"Kapamarintahan tara magbalik in dunya",
Biya' laung sin kamaas-maasan ta,
"Katu' tue' in katilingkal sin laud",
Hangkan kita ngiyanan Sulug @ SUG,
Sabab sin sifat ta maguntas tawid,
Way duhul dunya di' kaabutan ta hibanug,
Mamais dagat in adjung ta tutug,
Kabugaan sin katan bangsa bang umuntas na laud,
Hisiyu in di' dimihil sukay, langpasan,
Bang umatu hukutan,
Dahun pahigad hinangun dagangan.

In bangsa ta tagnah kakilahan sin hula' MALAYU,
Nag babaran basi' nag aatay kayu.
Nag dara kalis Sundang way makaatu,
Daing ha China magda dagangan sampai pa hula' Arabiya,
Nakaabut pa hula' Ugis Mediterranian in ngan niya,
Hangkan kiyabin in Kasamalan-Badjao ta didtu kanila,
Sampai pabihaun kiyanganan Bangsa Laud Phoenisiya.

Hula' Arabiya ha jaman jamulay in Bangsa Sug tannyag,
In Bangsa Sug muna-muna himinang tabu' ha lupa' datag,
Hangkan in Arab in pagsabbut niya tabu' "Suq",
In bangsa ta bang magSULUG na ilmu' pagkausug,
Magtafakkur ha higad-higad limingkud,
Ammalan sin kamaasan ta TAU BUD,
Ngianan BUDDHA-NUN atawakan Buranun,
Hangkan awun ngiyanan ammalan "Suluk" bihaun,
Kiyawa' sin Arab ha ngan ta SULUG.

Hangkan, ayaw kita mainu-inu,
Nahipu' in kapu'an Sug natu',
Sin bangsa Arab, Eropa, Lannang iban Malayu,
Ha nakauna yadtu,
Sabab sin "Suluk" bangsa ta,
Taga hula' ha katilingkal dunya,
Kiyaingatan nila in daya ta,
Isug iban pagkamanusiya',
Asal in kita bakas namamarinta kanila,
Sabab kita ra in anak apu' Adam,
Muna-muna maingat matanam,
Maghinang adjung magdagang di' magkagusam,
Pa pandai pera, pa nakauna nagusal tumbaga,
Muna-muna nanghindu' titimbakan pa hula' China,
Ha masa sin kamaasan ta,
Namarinta sin Champa Uttara'.


IN KATAN YAN PUTING

Huon tuan,
In Bulansang ku ini puting katan,
Sabab marai' ha pikilan niyu way kasabunnalan,
Hat sadja ligaw sin tau nahihilu hapag "tripan",
Bang baha' kiyaingatan niyu tuan,
Hisiyu in bangsa ta ha panagnaan jaman,
Di' sayan in manga magsusultan yan,
Magpasad ha baba'an buli' sin satru',
Sabab, in pangannal nila kunu',
In territory sin Sultanate amura yaun in laggu'-laggu'.

Bang in katan yan puting,
Mari baha' in China tumuntut sin Spratly?
Imiyan "In Spratly dihil kamu' sin kamaasan sin TAUSUG Sultanate?"

WALLAHU A'LAM BISHAWAB.....