Sara' Pa Manga UTC Ha Guwa' Hula'

Posted by DZULASREE @ Asree Sug on Friday, October 2, 2009 0 ulasan

Hipamahalayak namu' pamanga kataymanghuran Tausug ha UTC in parakala' ini, supaya sila kaluhayan bang sila gumuwa' hula' (Malaysia iban Indonesia). Pangasubu, biyaddiin baha' in pagyanun namu' makaluhaya? Makaluhaya kanila maghinang ha Malaysia atawa makaluhaya kanila mamisita pa kataymanghuran?, amu ini in subay ta hatihun iban patilagun maraw bat in UTC di' maawam atawakan mainu-inu. Dihilan ta dan atawa jawaban bang mayta' in bangsa ta "saggawun-jilun" sin Malaysia ha Sabah iban biyaddiin in dan ha supaya in sila (manga tau Sulu) di' masaggaw nila.

Undang-undang iban panghati sin Malaysia
Muna-muna hatihun taniyu in sara' sin Malaysia ha kahalan kapatut sin bangsa ta (tau Sulu) di ha Sabah. In bayta' sin manga kamaasan ta in North Borneo (Sabah) ini in tagdapu niya Tausug iban Sultaniyyah sin Sulu, bunnal baha'? Bang asubuhun ta in Malaysia laung nila in Sabah ini kanila, bunnal baha'? Sumambung isab in Brunei, in Sabah ini bahasa kanila pa masi, bunnal baha' da kanila? In manga kahalan "magkaniya-kaniya" sin Sabah yan kaingatan bang kan siyu subay da kitaun ha nusulan (History) iban unu in kiyasulat ha sara' sin Malaysia (ha way kiyaingatan ta). IN sara' sin Malaysia ha kahalan sin Sabah iban bangsa ta dugaing in aturan nila ha guwa' iban sin siyusulat nila (tiyatapuk). Bang haguwa'laung nila,

  • 1-In Sabah ini ha Malaysia in tagdapu,ha sabab kasud sin Sabah iban Sarawak pa Federal Malaysia 16 September 1963 daing ha British.
  • 2-Iyakunan sin United Nation bahawa in Sabah Sarawak ha Malaysia in tag kaput.
  • 3-Kiyabayaan sin manga kanakura'an sin Sabah ha masa yadtu hangkan naawun in Suruhanjaya Cobbold (tiyumbukan bakul lima sin kadatuan) ha supaya sumud pa Malaysia, gimuwah daing ha "lima" sin Sultaniyyah sin Sulu.
  • 4-Piyag-uhanan sin Datu Mustapha, iyakunan sin panubu' sin Sultan Sulu, Sultan Julaspi Kiram (in sultan ini 'plastik' laung sin makahati, hangkan na jil ha Kuala Lumpur ha masa sin Tunku Abdul Rahman).
  • 5-Malaysia hula' independen, hisiyu in sumud pa Malaysia daing ha hula' dugaing subay mag "passport", hangkan bang sila Philipino subay sila mag passport sumud pa Sabah ampa sila di' "kalabusuhun" ha laum jil.
  • 6-In Malaysia miyagad ha undang-undang sin International Law, in imegration niya nag u-usal Jus Soli.

In parakala' nasabbut ha taas yan bunnal, hangkan in Sabah kiyakawasahan sin Malaysia sabab sila in kiyaamanatan sin hula' Sarawak iban North Borneo daing ha British. Hangkan mayta' in bangsa ta bang sumud palaum Sabah saggawun nila misan kita mag daawa in Sabah katu'. In bunnal tuud Way kiyaingatan sin bangsa ta misan sila way passport atawa kan Identiti Card Malaysian di' sila saggawun bang sila sumud pa Sabah. Biyaddiin baha'?

Hula' Sulu Tiyapuk
Awun report daing hambuuk taymanghud taniyu (daing ha manga Professor MSU Bongao) bahawa halaum ASEAN hambuuk da hula' in kiya-register ha United Nation (iyakunan sin United Kingdom of England) amura in hula' ngiyanan sin dunya "United Kingdom of Sulu". In lu-ag sin United Kingdom of Sulu daing ha Mindanao pa Langkasuka (Kedah-Pattani, ha Malaysia-Thailand bihaun), pa Vietnam sampai pa Taiwan. Lamud na in Kalimantan-Sarawak, Sulawesi (Sulu East Sea, ha dila' sin Kastila' iban Dutch, Celebes) sampay pa Sumatera-Riau, lamud pa in Johor iban Singapore. Ha United Nation kiyasulat iban kiyasabbut in manga hula' nasakup sin United Kingdom of Sulu ha symbol SXXX,SXX,SX....., in "S" yan Sulu, symbol atawa kan code sin sulat lupa' sin Sulu ha United Nation.

Na-awun in MAPHILINDO kiya-signan hi Macapagal ha tahun 1964, in bunnal niya in Maphilindo nabaktul na ha tahun 04/04/1954 kiyasaksian sin Queen United Kingdom of England. Maksud sin MAPHILINDO (Malaysia, Philipines, Indonesia) 3 hula' namus atawakan jimaga sin lupa' sin United Kingdom of Sulu salama 50 tahun. Puas 50 tahun in MAPHILINDO ma tammat subay hibalik nila in lupa' ha tagdapu. Meaning ha tahun 04.04.2004 ma tapus na in paljanjian 50 tahun ini. Hangkan pagpuas sin 2004 nag agaw magtuy in Malaysia iban Indonesia ha pu' Sipadan iban Ligitan. Pagubus Singapore isab iban Malaysia nag agaw sin Pu' Batu Puti'.

Mayta' sila nag agaw? Sabab in Sulu way ra nahinang hula', masi-masi pa ha babaan sin Philipines puas 2004, nalawa' na in Sultan niya iban raayat sin Sulu nahinang na katan Philipino. Bang in Sulu independen makawa' nila balik in kalupa'-lupa'an nila ha katilingkal sin South-east Asia. In nakaingat ha kahalan ini USA da, hangkan biyustak nila in duwa building nila ha New York 11 September 2001, ampa sila maluhay sumud pa Sug naghinang BALIKATAN iban USAID. Hi Gloria asal nakahati hangkan siya in miyuna-muna himatud sulat pa George Bush mangayuh tabang hipabunu' niya in Abu Sayyaf bahasa, sabunnal niya bat in USA makasud. USA simud sila ha tahun 2002 pa SUG pagubus sin pagbustak duwa building ha New York 9/11. Yanna matuud in USA jimaga sin Sulu, kiyabistuhan sin Congres Visaya' ha Manila, hangkan nag paawun sila parhimpunan bat MAHALAW nila in USA dain ha SUG. Di' na sayan manga taymanghud mahalaw, hangkan sila yan namunu' ha Sug bihaun kimawa' sadja sabab bat sila tutug duun ha SUG. Mayta' sila dumuun?

  • 1-Sabab in MAPHILINDO natapus na, in Sulu "anytime" gumuwa' daing ha "tutuban" hangkan in nahinang "panday" subay masapat iban maingat, amuna in USA yan ha SUG sumambut sin kalahir sin Sulu.
  • 2-Liyasa-lasa niya in Tausug atawa kan Tau Sulu sin USAID, maghinang infrastruktur (maghinang iskul, dan kalsara, puunan tubig etc.).
  • 3-Magdevelop sin Sulu mahunit, subay lissinan muna daing ha manga nagkakaput armass in Sulu ampa dahun nila sumud in manga kamastalan daing ha United Nation ha susungun adlaw. Hangkan marai' biyunu' nila bihaun in manga mujahidin ha Sug sabab sin pag lissin ini.
  • 4-Timagad sila ha group independen amin way nangaku PHILIPINO, atawa amin nakapaaun sin Sovereignty "magTausug" atawakan Sulu people in identiti nila, amin raayat taga Sultan sila. Asal kiyaingatan sin US in Sulu amura in maka independen sin Mindanao. Way piyaruli nila in pagnganan BANGSAMORO ha Mindanao iban ha Sulu sabab USA da in nagbaktul hayan ha tagna' pa yadtu ha supaya way makakawa' iban makasud pa Sulu ha sahingga matapus in 50 tahun MAPHILINDO.
  • 5-Sulu hipu' sin petroleum iban bulawan ha laud, importante tuud ha USA sabab in currency nila bihaun nahulug. In ekonomi sin US bihaun jag-jag, subay da siya lumawag hula' dayahan amin makatabang kaniya magpauli' sin ekonomi niya. In Sulu dayahan, hisiyu in makakaput sin Sulu siya na in pinakadayahan halaum dunya. Bukun dusa sin Philipinas hangkan kita way na independen sabab mismu in Philipinas hiyuhukutan da daing tagna'.
  • 6-Tabangun nila in Sulu mahinang hula' bat makatabang isab kanila, kiyaingatan nila in Tausug bakas nakabissara "Pad-pad Philipines maraw pa USA in mahinang administrator & Proctorate sin Sulu".

Amurakuman in mahinang ta problema, bang sila dumaak ha Sulu tumuntut sin lupa' iban alta' nila ha katilingkal dunya, in Muslim pagkahi makapagbunu', in Malaysia iban Indonesia di' tuud magpasad makawa' in Kalimantan, Suluwesi, Sumatera-Riau, Sarawak iba Sabah. In manga Malaysia iban Indonesia, sila yan taymanghud ta hangka agama, liyalasa nila kita daing tagna'. Di' da isab manjari dihilan ta sila kasa'an sabab sin piyaghalaw in bangsa ta daing ha Sabah, sabab in sila kiyahukutan da isab.

In Vietnam iban Taiwan hipakawa' da marai' ha Sulu, hangkan biyunu' sin USA in Vietnam tagnah ha tahun 1971 sabab sin Vietnam hababaan sin kawasa Sulu ha masa pa sin Sulu Zone, hangkan isab in Taiwan di' makawa' sin China sabab Taiwan tagna' hababaan sin Sulu. Bihaun in Taiwan jiyajagahan sin USA. In kabayaan ta, misan kita tabangun nila mag independen, di' sila makalamud atawa makapagbaya' ha pamarintahan sin Sulu iban bukun sila bunu' baibidda' kalaugan in manga raayat way dusa.


Philipino Way Hak Ha Sabah
Hibalik ta pa undang-undang sin Sulu bang mari pa Sabah, in Tausug atawa kan Tau Sulu, awun freedom nila magsud guwa', bistahun ta,

  • 1-In Sabah masi pa ha Tausug iban Sultaniyyah sin Sulu ha sabab ngan PADJAK (LEASE) sin North Borneo iban Sarawak daing ha masa timagna' in padjakan 1878 in bukti' niya sampay pa bihaun in Malaysia masi pa nag babayad sin LEASE 5,300 ringgit hangka tahun pa 9 waris sin Kiram Family.
  • 2-Misan di' ta kleimun asal da maklum, hangkan in Sultan sin UTC way nagngan "Sultan of Sulu & Sabah", ngianan sadja Sultan Sulu sabab in maksud sin Sultan Sulu malu-ag.
  • 3-In Malaysia masi pa ha babaan sin United Kingdom Of England, kiyaingatan ta in hal ini sabab sin Suruhanjaya Cobbold. In manga karatuan ha Sabah biyaitaan sin manga Anggalis wakil sin suruhanjaya Cobbold bahawa in Sabah subay sumud pa Malaysia sabab in Anggalis da in namarintah. In pamarintahan sin Anggalis laung nila pindahun daing ha Kota Kinabalu pa Kuala Lumpur. Hangkan in Malaysia kahaba' 5 tahun (ubus election) subay humatud MEMO pa England mag Continue sin pamarintahan nila.
  • 4-Ha undang-undang sin Sabah iban Sulu in Tausug Sulu awun freedom nila magsud guwa'. Bang in tau Sulu sumud pa Sabah subay di'saggawun, bang sila saggawun kugdanan sila sin sara'.

Pangasubu mayta' in Tausug bihaun saggawun da sin Malaysia bang sumud pa Sabah? Jilun nila hilaruk palaum "Rumah Merah" ampa hilabak halawun pa Philipines? In bunnal niya in tagdusa manga Tausug Sulu da sabab "imakun sila Philipino". Bang asubuhun sin polis daing haiin sila, imiyan sila "Kami Tau Philipines" hangkan sila jilun ampa halawun pa Philipines sabab tau Philipines da sila bukun tau Sulu atawakan Tausug raayat sin Sultan Sulu. In Philipina di' manjari sumud palaum Sabah, subay da umusal Passport.


UTC Tiyaima' Ha Sabah
Sasuku' sin bangsa ta piyaganak ha Sabah misan way IC atawa passport bang sila awun Sulat Lahir daing ha UTC (kiyawa' ha Buansa) di' sila saggawun ha Sabah. In reason sin Malaysia maluhay da, in Sabah laung niya hak sin Sulu jiyagahan kiyaputan sin Malaysia sadja biya' pagjaga sin British pa North Borneo, sasuku' sin naggulal Tausug atawa Tau Sulu bang awun bukti' in sila raayat sin Sultanate Of Sulu di' sila manjari saggawun. Bang saggawun kugdanan sila sara' sin international law, 1 raayat saggawun sin hambuuk hula' ha bukun hak niya, in multa niya 1 million USD ha United Nation (UN).

In manga Tausug atawa manga tau Sulu subay sila mawun pa Buansa mag register sin family atawa lawlahasiya' nila ha ofis United Tausug Citezen bat sila mabilang "raayat sin Sultaniyyah sin Sulu". Bang masi-masi naman Philipino atawa nation dugaing hula' di' sila mabilang raayat sin Sultaniyyah sin Sulu salama-lama. Amura ini in makahundung sin bunu' iban pissuku' sin satru' mari katu'. Makaluuy in manga taymanghud ta liyaugan sin manga kaibanan danan sila biyunu'.

Way sab mahinang ta malaingkan umatubang kanila bang kita in iyunahan sin bomb nila. In Solution yanda ha UTC, duun kita niyu magtipun magtuyung tabang bat makabalik in pamarintahan sin Tausug iban Sultaniyyah sin Sulu, ampa makabalik in kawasa sin Islam, ampa makabalik in Mindanao, ampa mapabuntul in sara' manara' sin Sulu amin di'na makapagbaya' in manga Sultan mangagaw asawa sin kaibanan sabab in raayat didhilan da kawasa. Sapantun pamarintahan sin Sayyidina Umar r.a., bang laung niya siya mabingkuk subay pabuntulun sin manga raayat.

Manga taymanghud, in maghambuuk maluhay, sagawa' kita niyu in nag pahunit nag pasigpit. Bukun sa' sin Islam, in nag sa' amin tau nag agama Islam amin piyalabi nila in hawa nafsu nila, danan maluhay usalun papag maunuk-manukun. Karinakamu manga taymanghud mag hambuuk halaum 1 ummah, ummat sin Rasul Sallallahu 'alaihi wasallam, bukun sah sin Philipinas, bukun sa' sin Malaysia, bukun sa' sin Indonesia, sagawa' sa' sin kita niyu amin na pupulakkanat, subay ma masacre in bangsa taniyu ampa kita niyu maghambuuk (biya' sin nag hapen ha Sug bihaun), sagawa' bang way bunu' kita isab hangkabangsa magpatay.

Hangkan lupahun tana in pagkuntara, lupahuntana in "gulal" (MNLF,MILF, Abu Sayyaf, UTC) bang sawpama amunayan in di' ta hikapaghambuuk, mawun kita niyu pa laum kalimat "Syahadatein", Asyhadu anla ilaha illallah, wa asyhadu anna muhammadan 'abduhu warasuluh".

Pahamun Ta In UTC
In United Tausug Citizen bukun siya tumpukan atawakan gropo amin nag mufarrik daing ha maksud, malaingkan hambuuk siya ngan piyaghambuukun sin manusiya' daing pa katagna'. UTC bang ta Tausugun, Paghambuukan sin manga raayat Tausug piyagnakuraan sin Sultan. Mayta' laung ta in maksud sin UTC bihayan, sabab amunayan in Chop atawakan Label ta daing katagna' pa yadu sawaypa karatung sin manga satru'. Meaning nag balik kita pa asal sin pamarintahan sin kamaas-maasan taniyu. Amurayan in kiyasulat ha United Nation kiya-register sin England. Bang in kamaas-maasan taniyu nabingkuk subay buntulun taniyu bihaun, bang sila nasa' baktulun ta sila sin kasabunnalan.

Bang kita umusal "Raayat Sulu piyagnakuraan sin Sultan" manjari kita lilayun ha United Nation, sagawa' bang kita umusal dugaing daing hayan iyanun sadja kita, "Ah!! Problema bayan sin laum Philipines bukun international problem" sabab laung nila bang bukun da Tausug atawakan Sulu Nation iban Sulu Sultanate salama-lama papagbunu'-bunu'un sadja. Wassalam.

(Magsukul pa manga taymanghud daing ha manga UTC Lahad Datu iban Sandakan ha information nila. Labi-luba' na kan Bro. Al amin nakapila na siyaggaw sin polis piyaguwa' da sabab in diyara niya Sulat Lahir daing ha UTC da in katarrangan niya. Laung sin parinta, di' siya manjari saggawun sabab raayat siya sin Sultanate Of Sulu. Mataud da isab in UTC nasaggaw liyuun pa rumah merah sabab imiyan da sila Philipino atawa laung niya kiyawa' nila in Sulat Lahir sin UTC daing ha Philipines. Awun da isab UTC in siyaggaw sabab in sulat Lahir nila nakukumu' iban kiyugdan sin tubig, laung sin polis bahasa palsu kunu' bukun bunnal daing ha UTC Buansa. Pangindan kamu manga taymanghud)

Asreesulu

Post a Comment